Archive for the ‘பம்பர ஞானம்’ Category

பம்பர ஞானம்

top

அமாவாசை நள்ளிரவு. எல்லோரும் உறங்கிக் கொண்டிருக்கிறார்கள்.

வானத்தில் நிலா இல்லை; நட்சத்திரங்களும் இல்லை.

ஓர் இலைகூட அசையவில்லை.

எங்கும் நிசப்தம்; நிச்சலனம்.

உலகமே ஸ்தம்பித்துவிட்டது போல் தெரிகிறது.

ஆம்; உண்மைதான். உலகம் ஸ்தம்பித்துவிட்டது போல் தெரிகிறது. ஸ்தம்பித்து விடவில்லை.

எல்லோரும் உறங்கிக் கொண்டிருக்கிறார்கள். ஆனால் மூச்சு விட்டுக் கொண்டிருக்கிறார்கள்; கனவு கண்டு கொண்டிருக்கிறார்கள்.

நாம் நினைப்பதுபோல் உறக்கம் என்பது இயக்கமின்மை அல்ல; அதுவும் ஓர் இயக்கமே.

அமாவாசை. அதனால் நிலா தெரியவில்லை. ஆனால் நிலா இல்லாமல் போய்விடவில்லை. இருக்கிறது.

மேக மூட்டம். அதனால்; நட்சத்திரங்கள் தெரியவில்லை. ஆனால் நட்சத்திரங்கள் இருந்துக்கொண்டுதான் இருக்கின்றன.

இலை அசையவில்லை. ஆனால் இலைக்குள் ஆயிரமாயிரம் அணுக்கள் இயங்கிக் கொண்டுதான் இருக்கின்றன.

நிசப்தம் என்றால் சப்தமே இல்லாமல் போய் விடவில்லை. காற்று மண்டலத்தில் ஒலி பரப்பப்பட்ட எத்தனையோ சப்தங்கள் உலவிக் கொண்டுதான் இருக்கின்றன. நம் செவிகளுக்கு எட்டவில்லை. வானொலிப் பெட்டிகளுக்கு எட்டும்.

நிச்சலனம் என்றால் எல்லாச் சலனங்களும் நின்று விட்டன என்று அர்த்தமல்ல. இயற்கையில் சலனங்கள் இடைவிடாமல் நடந்து கொண்டிருக்கின்றன. நமக்குத் தெரியவில்லை.

பூமி சுழன்றுகொண்டுதான் இருக்கிறது. நமக்குத் தெரிவதில்லை.

பூமிக்குள் எத்தனையோ விதைகள் மெல்ல வளர்ந்துக் கொண்டிருக்கின்றன.

எத்தனையோ மொட்டுக்கள் மெல்ல மலர்ந்து கொண்டிருக்கின்றன.

ஆட்டத்தின் (atom) ஆட்டம் இடைவிடாமல் நடந்து கொண்டிருக்கிறது.

நமக்குத் தெரிவதில்லை.

இயக்கம், உறக்கம் இரண்டும் இயற்கையின் சுபாவம்.

ஆனால் அந்த இரண்டும் தனித்தனியாக நடப்பதில்லை.

அதாவது இயற்கை கொஞ்ச நேரம் இயங்குகிறது. அப்புறம் கொஞ்ச நேரம் உறங்குகிறது என்பதல்ல.

இந்த இரண்டும் ஏக காலத்தில் நடக்கின்றன.

இயற்கை ஓர் இயந்திரத்தைப் போல்
இடைவிடாமல் இயங்கிக் கொண்டிருக்கும்
போதே, ஒரு சித்திரம் போல் உறங்கவும்
செய்கிறது.

என்று மோஸ்லே என்ற அறிஞர் கூறுகிறார்.

இது இயற்கையின் அதிசயம்.

உண்மையில் இயக்கம். உறக்கம் என இரண்டு இல்லை.

அப்படித் தெரிவது ஒரு மாயை.

இயக்கத்துக்குள் உறக்கம் உண்டு. உறக்கத்துக்குள் இயக்கம் உண்டு.

இன்னும் சரியாகச் சொல்வதானால், இயக்கமும் உறக்கம்; உறக்கமும் இயக்கம்.

இஸ்ஸாவின் ஹைகூ இது:

நான் உறங்குகிறேன்
மலை நீரை
மாவிடிக்க வைத்துக் கொண்டு

இஸ்ஸாவின் மாவரைக்கும் இயந்திரம் மலையிலிருந்து இறங்கிவரும் நீரால் இயங்குகிறது.

ஆனால் இஸ்ஸா தானே மாவரைப்பதாகக் கூறுகிறார்; அதாவது மலை நீரின் மூலமாக.

இஸ்ஸா தன்னையும் இயற்கையின் ஒரு பகுதியாக … அல்ல அல்ல இயற்கையாகவே கருதுகிறார்.

இஸ்ஸாவும் இயற்கை. மலை நீரும் இயற்கை.

இயற்கையே இஸ்ஸாவாக உறங்குகிறது; மலை நீராக மாவரைக்கிறது. ஒரே நேரத்தில்.

என்ன ஓர் அற்புதமான தரிசனம்!

வைணவம் இறைவனைப் பள்ளிகொண்டவனாக அதாவது உறங்குகிறவனாக காண்கிறது.

சைவம் இறைவனை நடராசனாக – எப்போதும் ஆடிக் கொண்டிருப்பவனாகக் காண்கிறது.

இரண்டும் வெவ்வேறல்ல. ஒன்றுதான்.

பம்பரம் நன்றாக வேகமாகச் சுழன்றால் சுழல்வது தெரியாது. பேச்சு வழக்கில் அதை ‘உறங்குகிறது’ என்றுதான் சொல்லுவார்கள்.

அடடா! எவ்வளவு பெரிய விஷயம் இதில் வெளிப்படுகிறது.!

சரியான வேகமான இயக்கம் உறக்கமாகத் தெரிகிறது !

ஞானம் பெறுவதற்கு ‘அம்பர’த்தைப் பார்க்க வேண்டியதில்லை. பம்பரத்தைப் பார்த்தால் போதும். அதோ! தாயுமானவரின் பாடல் கேட்கிறது.

சாட்டையில் பம்பர சாலம் போல் எல்லாம்
ஆட்டுவான் இறை

அண்ட சராசரங்கள் எல்லாமே பம்பரங்களே; நாமும்தான்.

இறைவன் ஆடும் பம்பரங்கள். சாட்டையில்லாமல் ஆட்டும் பம்பரங்கள்.
– ‘இது சிறகுகளின் நேரம்’ (முற்பகுதி) தொகுப்பிலிருந்து

Advertisements